Salade paysanne / Cabillaud Réck am Gromperenmantel

Salade paysanne / Cabillaud Réck am Gromperenmantel

Christian Ewen – Restaurant du château Klierf

 

Dës Woch kommen eis Rezepter vu Klierf – aus dem Restaurant du Château. De Christian Ewen hutt de Restaurant 2015 am wonnerschéine Kader ronderëm d’ «Cliärrwer Schlass» opgemaach.
De Christian ass ee grousse Fan vun der franséischer Kichen, gëtt de klassesche Rezepter awer och ëmmer gär eng speziell international Note unhand vu spezielle Kraider, Gewürzer oder méi speziellen Ingrédienten.

Säit Dezember 2020 ass de Restaurant du Château am Gault&Millau gelëscht, wou de Christian eng Bewertung vu 14/20 Punkte kritt hutt. Et versteet sech deemno och vum selwen, dat een zu den innovativen Platen och ëmmer de passende, mëscht lokalen Wäi proposéiert kritt. Een ideale Kader also fir ee gastronomesche Menü mat engem gudde Pättchen a sympathescher Gesellschaft ze genéissen.

 

 

Salade paysanne – 4 Persounen

1 Bio-Zalot
1 Enn
2 Schallotten
4 Bio-Eer – Gréisst M
500g Bio-Champignons kleng geschnidden
100g Speck a Sträife geschnidden

Fir den Dressing:

1 El. Moschter
4 El. Sonnenblummenueleg
1 EL. Olivenueleg – extra vierge
3 El. Wäisse Balsamico Esseg
1 Strauch Thymian
1 ZEl. Botter
Salz a Peffer

Fir d’éischt wäsche mir d’Zalot grëndlech an 3 Kéieren schleideren se dono dreschen.
Fir den Dressing ginn d’Ennen a Schallotten a kleng Wierfele geschnidden.  De Moschter mam Esseg vermëschen an den Ueleg mat Hëllef vun engem Schnéibiesem drënnerhiewen. Dono kennen dann d’Ennen, e Grapp voll Schallotten esou wéi de frëschen Thymian dobäi kommen. Dat Ganzt mat Salz a Peffer ofschmaachen a kal stellen.

Uschléissend maache mir eis un de Speck an d’Champignonen. Heivir fir d’éischt de Rescht vun de Schallotten am Botter ubroden an uschléissend de Speck an d’Kochelen dobäi ginn, wierzen a kachele loossen.

Als läscht, éier mir alles schéin zesumme präsentéieren, maache mir eis un d’pochéiert Ee. Heivir huele mir eng Kaffistaass an e Stéckelche Frischhaltefolie, mat der mir d’Taass ausfëllen, ginn eng Drëps Olivenueleg an dann een Ee dobäi. De Plastik gëtt dono zougemaach, virsiichteg an een Deppe mat kachendem Waasser geluecht a vir 5 Minutte kache gelooss. Dëst kenn dir dann nach 3 mol widderhuelen, dat dono och jiddereen säin eegent pochéiert Ee um Teller hutt.

Elo alles schéin zesummen uriichten, d’Champignonen an de Speck schéin an der Mëtt, den Zalot ronderëm an d’Ee drop, den Dressing dobäi a schonns hutt dir eng lecker Salade paysanne.

Gär kenn dir och nach jee no Saison fein Radiesercher, dënn geschnidde Concombren oder soss Cruditéite jee no Geschmaach a Loscht bei d’Zalot dobäi maachen.

 

 

Cabillaud Réck am Gromperenmantel – 4 Persounen

4 Cabillaud
16 geschielte Muerten
500g Gromperen
1 Botte gehackte Péiterséileg
1 Botte gehackten Thymian
1 Zitrounenschuel
6 El. Olivenueleg
1 Schallott
2 El Botter
Zocker, Salz  a Peffer

 

 

 

Déi éischt Etapp fir d’Zoubereedung vun dësem Menü gehéiert de Gromperen. Dës schiele mir an halen eis 1 Gromper op der Säit – de Rescht gëtt a kleng Wierfele geschnidden an uschléissend gekacht. D’Gromper déi mir net gekacht hunn, schneide mir a kleng reng Rondelen a placéieren se op de Réck vum Cabillaud op déi Säit vun der Haut. Dës Säit gëtt uschléissend mat den Gromperen am Botter ugebrode bis se eng schéi goldeg Faarf hunn. Dono de Fësch mat de Gromperen an eng feierfest Schossel ginn, wierzen a fir 5-6 Minutte bei 160° am Uewen kachen lossen.

Déi 2 Etapp gëllt der Preparatioun vun de Muerten. Heivir Botter, Muerten , Thymian, ee Grapp Zocker an e bësse Salz an ee Kachdëppe ginn. Waasser iwwert d’Muerte schëdden, esou dat d’Hallschent bedeckt ass an dann zum Kache bréngen. Dono d’Hëtz reduzéieren an dat ganzt bei niddreger Temperatur brutschele loossen, bis dat d’Waasser verkacht ass.

D’Gromperen déi mir gekacht hunn no enger gudder 20 Minutten, wann se mëll sinn, ofschëdden a mat Hëllef vun enger Forschette zu engem Püree zerdrécken, Olivenueleg an de Péiterséileg dobäi ginn.

An enger leschter Etapp virum uriichte ginn dann d’Schallotte mam Olivenueleg an enger Pann mat de kleng gehackte Kraider esou wéi der Zeste vun der Zitrouneschuel a e bësse Paprikagewierz ugebroden.

Elo muss eise Menü just nach op den Teller komme – hei kennt de Fësch mat de Gromperen drop op de Püree an d’Mëtt leien an d’Muerten an enger Sonnenform ronderëm de Fësch. D’Schallotten-Kraiderzooss déi mir an der leschter Etappe gemaach hunn, kenn Dir dann och an enger Kreesfërmeg ronderëm de Fësch an d’Muerten uriichten.

D’Ekipp aus dem Restaurant du Chateau wënscht Eech ee gudden Appetit!