Rubbarb Rosmarin Taart KW21

Rubbarb Rosmarin Taart

Lola Valerius – chocolatier

 

D’Lola Valerius hutt e méi spezielle Liewenslaf – no sengem Ofschloss hutt d’Lola zu Wien ee Bachelor an der Architektur gemaach. Als Architekt wollt d’Lola awer net schaffen, mee vill méih senger Leidenschaft, dem Baken nogoen. No engem Stage hei am Land ass d’Lola dunn op Paräis gaange fir eng Ausbildung zum Patissier ze maachen an hutt uschléissend eng Zäitchen am Taiwan geschafft éier et erëm op Paräis zeréck war, fir beim bekannte Chocolatier Patrick Roger ze schaffen. Am Fréijoer 2021 hutt d’Lola dunn seng eege Chocolaterie zu Esch an der Avenue de la Gare 37 opgemaach.

Méi Informatiounen heizou fann dir um Internetsite https://lolavalerius.com/ esou wéi op Instagram a Facebook.

 

 

Pochéierten Rubbarb

1000g Waasser
220g Zocker
½ Staang Vanill
6-8 Staangen Rubbarb

De Rubbarb schielen.
Waasser an Zocker zesumme mat  de Schuele vum Rubbarb an der Vanill opkachen.
Wärend der Zäit de Rubbarb an ongeféier 7cm laang Stécker schif ofschneiden. D’Stecker sollen net méih wéi 2-3cm deck sinn.

Déi Stécker déi iwwreg bleiwen oder net schéi genuch sinn net ewech geheien, doraus kache mer nach en Kompott!
De geschniddene Rubbarb kennt an eng Schosselen. De gliddege Sirop driwwer schëdden. Dat Ganzt ofdecken an iwwert d’Nuecht ofkille loossen, dofir brauch der et net an  Frigo ze stellen, mee et kann einfach an der Kiche stoe bleiwen.

 


Rubbarb Kompott

Aus de Schuelen an de Reschter Rubbarb kache mer nach en schnelle Kompott fir dass och näischt ewechgeheit gëtt.
Ofweie wéi vill der hutt, 10% Zocker derbäi maachen an 30 Minutten zéie loossen. Dono dat Ganzt kache bis et en Kompott entsteet an ofkille loossen.

 

 

Rosmarin Crème

250g Mëllech
50g Eegiel
60g Zocker
25g Maïzena
40g Botter
2 Sträich frëschen Rosmarin

Mëllech lues opkachen.Wärenddeem d’Eeër trennen an d’Eegiel mam Zocker opschloen. Dann de Maïzena dobäi ginn. Wann d’Mëllech kacht dat ganzt iwwert d’Eemeschung kippen a mam Schnéibiesem gutt verréieren. Zréck an Dëppe schëdden a stänneg réiere bis d’Crème fest gëtt. Vum Feier huelen an de Botter ënnermëschen. Lo d’Crème an eng propper Schossel schëdden a mat Klarsichtfolie ofdecken an iwwert d’Nuecht am Frigo ofkille loossen.

 

Den Dag selwer :

 

Taartenbuedem

100g mëllen Botter
75g Pudderzocker
25g Mandelpudder
2g Salz
1 Ee
200g Miel

De mëllen Botter an d’Schossel vun der Kichenmaschinn maachen a mam Blat glat réieren. Pudderzocker, Mandelmiel an Salz derbäi schëdden a mësche bis et homogen ass.
1 Ee ënnerréieren a ganz zum Schluss eréicht d’Miel dobäi ginn.
Soubal alles gutt vermëscht ass, den Deeg a Klarsichtfolie awéckelen  platt drécken, dass en méi schnell kal gëtt.
a 1 Stonn am Frigo roue loossen.
Duerno kann den Deeg ausgerullt an an d’Form bruecht ginn.

Fir sécher ze sinn dass den Deeg während dem blann Baken net a sech zesumme fällt ass et am Beschten den Deeg mat der Form fir eng 30 Minutten an de Frigo ze stellen oder 15 Minutten an de Fréiser.

Bei 180°C fir ongeféier 20 Minutte blann baken.

 

 

Montage

De Rubbarb ofschëdden an op engem Kichepabeier ofdrëpse loossen. Wärend der Zäit d’Crème mat engem Schnéibiesem liicht opschloen a kleng gehackte frësche Rosmarin no gusto ënnermëschen.
Den Taartenbuerdem mat Crème besträichen an awer e bëssi Platz loosse fir dass mer op d’Crème nach eise Kompott maache kënnen.
Wann dann den d’Crème an de Kompott drop sinn ass et um Rubbarb. D’Stecker Rubbarb vu baussen no bannen a Kreesser leeën an eng Aart Sonn maachen.

Fäerdeg ass eng super erfrëschend a saisonal Rubbarbstaart.

Gudden Appetit!